網紅的藏寶箱7年前，我唔算太鍾意小朋友，無辦法，性格孤僻，我眼裏只有鄉里。
意想不到地，讀者一個又一個出現之後，我變得好鍾意讀者嘅仔女，每次書展或出席活動/聚會見到，唔知點解個心都好暖，睇住佢哋由幼稚園、長大到小一，由中學升上大學，真係好開心。
之後，我就以為自己鍾意咗小朋友，點知，原來只係限於讀者嘅仔女，好偏心😅
到開咗教室，我又發現，自己對學生好似阿媽教女咁，好嚴厲但又好縱容，然後，到見到佢哋嘅仔女，竟然出現婆婆見孫之情，除咗想攬住嚟錫，陪佢哋瞓喺地下玩，佢哋整污糟啲嘢、倒瀉嘢我都只會笑，原來，我眼裏面已經望唔到啲學生，偏心偏到衝出宇宙😂
孫仔女真係好可愛又好乖，見到我時，會大聲叫「靈山！我好掛住你」，每次聽到，我都會掉低做緊嘅所有嘢，衝去攬住佢哋，「靈山都好掛住你呀！」
小朋友真係大得好快，開教室時都仲係讀緊幼稚園、仲係瞓緊喺我個地下，近排再見，已經入小學，講嘢有紋有路又有禮貌❤️
不過，我唔想佢哋大得太快，因為到入咗中學，個個就會好cool，到時只會拎住手機、係咁意又唔情願咁點個頭就算，聽講咁叫型🤣
Search